Aðstaða og umhverfi í Kaldárseli
Vinasetrið starfar í Kaldárseli í Hafnarfirði. Kaldársel er víðfeðmt útivistarsvæði þar sem hraun, mosi, gróður og vatn mætast og skapa umhverfi sem hvetur til frjáls leiks, hreyfingar og upplifunar í nánum tengslum við náttúruna. Svæðið dregur nafn sitt af ánni Kaldá sem rennur þar um og er áberandi hluti af landslaginu og upplifun barna á staðnum.
Húsnæði Vinasetursins er hlýlegt og notalegt sumarbúðarhúsnæði sem er vel aðlagað starfseminni. Þar er aðgangur að íþróttasal, matsal, vottaðri eldhúsaðstöðu, listasmiðju, Lego-herbergi og leikherbergi.
Náttúran í Kaldárseli er órjúfanlegur hluti af dvöl barna í Vinasetrinu. Börnin fá tækifæri til að leika sér frjálsum leik, smíða kofa, tálga, leika búleik og kanna umhverfið við Kaldá. Þar er oft drullumallað, fylgst með vatninu og brotinn ís þegar aðstæður leyfa og upplifunin mótast af árstíðum og veðri. Einnig er farið í hellaskoðun, gengið upp á Helgafell, legið í mosa og horft á skýin. Oft eru dýrmætustu augnablikin að gleyma sér í leiknum og þeim ævintýrum sem ímyndunaraflið skapar, og umhverfið styður við slíka upplifun.
Hjólreiðar eru einnig mikilvægur hluti af dvölinni og gefa börnum tækifæri til að hreyfa sig, prófa mörk sín, upplifa umhverfið á nýjan hátt og vinna litla, persónulega sigra sem styrkja sjálfstraust og gleði.
Í Vinasetrinu er lögð áhersla á að skapa öruggar og hvetjandi aðstæður þar sem leikur og upplifun fá að þróast á náttúrulegan hátt. Starfsfólk styður við leikinn, er til staðar og fylgir barninu án þess að stýra honum.
Vinasetrið er skjáfrítt svæði. Börnin skilja síma, spjaldtölvur og tölvuleiki eftir heima yfir helgina. Þetta styður við frjálsan leik, nærveru og raunveruleg tengsl við bæði umhverfið og hvert annað.
Vinasetrið starfar samkvæmt starfsleyfi frá Gæða- og eftirlitsstofnun velferðarmála (GEV). Húsnæði í Kaldárseli uppfyllir þær kröfur sem gerðar eru um öryggi, aðbúnað og hollustuhætti af hálfu heilbrigðiseftirlits og Slökkviliðs höfuðborgarsvæðisins.
Ef þú þarft frekari upplýsingar, þá er þér velkomið að senda okkur tölvupóst á vinasetrid@vinasetrid.is eða hafa samband í síma 895 0250.