Fyrirspurn
Fyrsta skrefið í umsóknarferlinu er fyrirspurn frá félagsþjónustu sveitarfélags. Fyrirspurnin beinist að því hvort úrræði Vinasetursins geti hentað barninu miðað við aldur, aðstæður og stuðningsþörf. Í þessu skrefi fer fram stutt samtal eða upplýsingaskipti þar sem metið er hvort rétt sé að halda ferlinu áfram og leggja inn formlega umsókn.
Umsókn lögð inn
Ef ákveðið er að leggja inn umsókn fær ráðgjafi barnsins umsóknareyðublað sem sent er til félagsráðgjafa Vinasetursins. Í umsókninni koma fram grunnupplýsingar um barnið og aðstandendur þess, ásamt lýsingu á stuðningsþörf barnsins og markmiðum með dvölinni.
Kynning og heimsókn
Í kjölfarið er haft samband við aðstandendur og þeim boðið að koma í heimsókn í húsnæði Vinasetursins ásamt barninu, þegar engin starfsemi er í gangi. Þar fá þau kynningu á aðstöðunni og starfseminni, tækifæri til að spyrja spurninga og koma á framfæri upplýsingum sem skipta máli fyrir aðlögun og líðan barnsins.
Ákvörðun um hóp og upphaf dvalar
Ef barninu og aðstandendum líst vel á úrræðið er ákveðinn hópur sem hentar aldri barnsins og ákveðið hvenær fyrsta helgardvölin fer fram.
Dvöl í Vinasetrinu
Dvöl barnsins hefst í húsnæði Vinasetursins í Kaldárseli. Í allri dvölinni er barnið í forgrunni og lögð er áhersla á að mæta því af virðingu, hlýju og fagmennsku, í samræmi við stefnu og gildi Vinasetursins.
Samskipti og eftirfylgd
Haldið er utan um skráningu á dvöl barnsins, þar sem meðal annars er horft til líðanar þess, samskipta við önnur börn, þátttöku í daglegu lífi, svefns og máltíða. Komi fram atriði sem kalla á eftirfylgd eða frekari upplýsingar er haft samband við aðstandendur og eftir atvikum við tilvísunaraðila. Að öðru leyti fara samskipti fram eftir þörfum og í samráði við aðstandendur og tilvísunaraðila.
Ef þú þarft frekari upplýsingar, þá er þér velkomið að senda okkur tölvupóst á vinasetrid@vinasetrid.is eða hafa samband í síma 895 0250.