Vinasetrið er heimili sem býður upp á reglubundnar helgardvalir fyrir börn á aldrinum 6 til 15 ára. Starfsemin er stuðningsúrræði fyrir börn sem þurfa á stuðningsfjölskyldu að halda eða uppbyggjandi uppbrot frá daglegu lífi sínu.
Hvert barn er einstakt og ástæður þess að börn og fjölskyldur nýta Vinasetrið eru fjölbreyttar. Sameiginlegt er þó oft þörf fyrir félagsskap, tengsl og að barnið upplifi að það tilheyri og eigi öruggan stað þar sem það er velkomið eins og það er.
Umsóknarferlið fer í gegnum félagsþjónustu sveitarfélaga og öll sveitarfélög geta sótt um helgardvöl fyrir sína þjónustuþega. Þar sem þarfir barna eru ólíkar er gert faglegt mat í samvinnu við félagsþjónustu og félagsráðgjafa Vinasetursins til að tryggja að úrræðið henti barninu og styðji við velferð þess með heildrænum hætti.
Stefna Vinasetursins
Stefna Vinasetursins er að veita börnum sem þurfa félagslegan stuðning heimilislegt athvarf án stofnanabrags. Starfsemin byggir á rútínu, fyrirsjáanleika og hlýrri nærveru þar sem lögð er áhersla á gleði, traust og nánd.
Í Vinasetrinu er unnið markvisst að því að skapa öruggt umhverfi þar sem börn upplifa virðingu, hlýju og raunveruleg tengsl. Markmiðið er að börn finni til öryggis, upplifi sig sem hluta af hópi og hlakki til að koma í Vinasetrið.
Markmið Vinasetursins eru að:
- styðja börn í að mynda jákvæð tengsl og taka virkan þátt í hópi
- efla félagsfærni og styrkja tilfinningu barna fyrir því að þau tilheyri
- efla seiglu, sjálfstjórn og skapandi lausnaleit með leik, sköpun og tjáningu
- styrkja rútínu og stöðugleika með fyrirsjáanlegum ramma og reglubundnum helgardvölum
- skapa jákvæða reynslu og góðar minningar sem börn geta byggt á til framtíðar
Ávinningur fyrir barn og fjölskyldu getur meðal annars verið:
- aukin félagsleg þátttaka og sterkari tengsl
- meiri trú á eigin getu og aukið öryggi í samskiptum
- betri rútína, jafnvægi og stöðugleiki í daglegu lífi
- léttir og stuðningur fyrir barn og fjölskyldu
Gildi
Gildi Vinasetursins eru gleði, traust og nánd.
Gildin endurspeglast í daglegu starfi, samskiptum, ramma og þeirri menningu sem mótar líf og starf í Vinasetrinu.
Trúnaður, öryggi og lagaumhverfi
Öll mál eru meðhöndluð sem trúnaðarmál og fyllsta öryggis er gætt við meðferð persónuupplýsinga.
Vinasetrið starfar samkvæmt barnaverndarlögum og starfsfólk er tilkynningarskylt samkvæmt þeim lögum.
Leyfi
Vinasetrið starfar með rekstrarleyfi frá Gæða- og eftirlitsstofnun velferðarmála (GEV).
Ef þú þarft frekari upplýsingar, þá er þér velkomið að senda okkur tölvupóst á vinasetrid@vinasetrid.is eða hafa samband í síma 895 0250.
